Llwyddiant llenyddiaeth Gymraeg arbrofol - ailargraffu Ebargofiant

Pan gyhoeddwyd Ebargofiant gan Jerry Hunter yn 2014, roedd yr arddull yn arbrawf lenyddol na welwyd ei debyg erioed yn y Gymraeg. Ond er bod yr arddull yn gwbl newydd, mae’r nofel wedi gwerthu allan ers dros flwyddyn ac erbyn hyn wedi cael ei hailargraffu.

Yn ddiweddar roedd y nofel yn Lyfr y Mis ar raglen Stiwdio, Radio Cymru, gyda Dr Elen Ifan yn dweud am y nofel:

“Dyma nofel wreiddiol, chwyldroadol, a chraff. Mae’n herio ac yn swyno’r darllenydd: yn trawsnewid yr iaith Gymraeg gyda’r orgraff newydd, ond yn creu cymeriadau agos-atoch-chi a hoffus yn yr un modd. Darn o lenyddiaeth gwirioneddol arbrofol sy’n cyfoethogi’r canon Cymraeg.”

Ysgrifennwyd y nofel gyfan mewn tafodiaith Gymraeg newydd, a grëwyd gan yr awdur ar gyfer y nofel. Mae’n rhaid i’r darllenydd weithio er mwyn ymgyfarwyddo â’r iaith, a’r dull sillafu, wrth ei darllen hi.

Meddai Jerry Hunter:

“Wrth reswm mae awdur yn falch gweld ei waith mewn print, ond yn bwysicach na hynny mae’r galw am Ebargofiant yn dangos fod diwylliant llenyddol Cymraeg yn amrywiol iawn ac yn iach iawn. “Nid yw pawb yn gwirioni’r un fath” yw’r dywediad, ac mae’n sicr yn wir yn achos llenyddiaeth Gymraeg fod rhywbeth at ddant pawb. Roedd pryderon y byddai’r nofel yn rhy heriol adeg y cyhoeddi, ond mae’r ffaith ei bod hi’n cael ei hadargraffu yn profi bod yna ddigon o ddarllenwyr sy’n mwynhau her lenyddol o’r fath! Ebargofiant oedd y nofel gyntaf i mi ei chyhoeddi gyda Gwasg Y Lolfa a dwi’n hynod ddiolchgar iddynt am fentro a chefnogi’r fath arbrawf.”

Yn wir, dywedodd y diweddar Toni Bianchi, awdur, beirniad a chyn-bennaeth Adran Lenyddiaeth Cyngor Celfyddydau Cymru, ar Radio Cymru: “Y llyfr gorau dwi wedi ei ddarllen erioed yn Gymraeg. Llyfr cwbl chwyldroadol…”

Mae Ebargofiant yn adrodd stori sydd wedi’i lleoli mewn dyfodol ôl-apocalyptaidd llwm, ar ôl chwalfa gymdeithasol ac ecolegol. Nid oes bron neb yn y gymdeithas hon yn gallu ysgrifennu, ac felly mae hunangofiant y prif gymeriad yn cynnig cipolwg ar y prosesau sy’n dod gyda dechrau llythrennedd.