Dyma stori ryfeddol Barbara Davies a adawodd Lerpwl yng nghyfnod yr Ail Ryfel Byd fel faciwî, "yn Saesnes uniaith bedair oed".
Yn Lerpwl bu yng nghanol un o'r cyrchoedd awyr mwyaf a welwyd ym Mhrydain erioed, sef Blits mis Mai 1941 pan laddwyd miloedd o drigolion Lerpwl gan ymosodiadau'r Luftwaffe. Ceir hanes Barbara'n cael ei hachub rhag tanchwa a laddodd dros 164 o bobl yn ysgol Ernest Brown, cyn symud i gefn gwlad Cymru yn ystod y rhyfel.
Ond cafodd gymaint o groeso yn Nhalgarreg, Ceredigion, fe benderfynodd aros ac ymgartrefu yng Nghymru, a hynny gyda John a Rachel Davies ar aelwyd Pantglas. Yn y gyfrol hon ceir darlun hyfryd o gefn gwlad Ceredigion ar ôl y rhyfel gyda disgrifiadau byw o hen arferion ar ffermydd yr ardal, o ddiwrnod lladd y mochyn i'r modd yr ymgodymwyd i'r "rations".
Ceir hefyd bortreadau cynnes a hwyliog o rai o gymeriadau'r fro gan ddynes a fydd yn fythol ddiolchgar i gymuned gymdogol a chroesawgar Talgarreg.