TitleCy

Antur newydd yng nghyfres boblogaidd Casia Wiliam!

Yr wythnos hon, mae Sara Mai yn ôl gydag antur newydd sbon. Mae Sara Mai ac Antur y Fferm (Y Lolfa) gan Casia Wiliam, yn ddilyniant i Sw Sara Mai a Sara Mai a Lleidr y Neidr. Mae’r ddwy nofel gyntaf wedi cyrraedd rhestr fer Gwobr Tir na n-Og (2021 a 2022), a bu i’r nofel gyntaf gipio’r Wobr yn 2021.

Y tro yma, mae Sara Mai yn mynd ar drip diwedd tymor i Fferm Tyddyn Gwyn, ac yn aros dros nos heb Mam a Dad am y tro cyntaf. Sut fydd Sara Mai a’i ffrindiau yn ymdopi, a pha ddireidi ddaw yng nghwmni Gomer yr afr a Tomi’r Tarw?

Daeth yr ysbrydoliaeth am y nofel yn dilyn ymweliadau’r awdur ag ysgolion:

“Es i ati i ysgrifennu’r stori ar ôl ymweld â llwyth o ysgolion Gwynedd a chael modd i fyw yng nghwmni plant y wlad. Dwi wedi benthyg ambell un o’u syniadau (gyda chaniatâd wrth gwrs!) ac yn mawr obeithio y bydd y stori hon yn plesio!”

Mae’r gyfres yn plethu ffraethineb a dwli (mae yna jiráff sydd yn ofn uchder yn y nofel gyntaf a gafr fach ddireidus yn y nofel newydd) gyda negeseuon pwysig.

Meddai Casia:

“Rwy’n gobeithio bydd cyfle i ymweld ag ysgolion eto gyda’r nofel hon, ac efallai ymweld â fferm i gwrdd â’r anifeiliaid hefyd!”

Dywedodd Bethan Gwanas am Sw Sara Mai: “Mae ’na hiwmor hyfryd yma, a llwyth o ddigwyddiadau … Clincar!”. Canmoliaeth hefyd a gafwyd gan Morgan Dafydd yn ei flog Sôn am Lyfrau “Mae'r iaith naturiol, hawdd i'w darllen yn golygu bod llyfrau Sara Mai yn berffaith ar gyfer plant 7-11 oed, a byddwn i’n argymell i athrawon ystyried buddsoddi ynddynt.”

Cafodd Sw Sara Mai glod hefyd am gyflwyno prif gymeriad hil gymysg ac am drafod hiliaeth.