I un artist o Geredigion, mae'r byd yn llawn o liwiau llachar, bywiog. Cyfleu "ysbryd y lle" wna Mary Lloyd Jones drwy ei phaentiadau o dirluniau, sy'n adrodd hanes Cymru, yr henwlad a lle cafodd ei magu. Meddai hi " Rwy'n ceisio creu cysylltiadau â'r gorffennol, yr atgofion gwerin, y mythau a'r chwedlau; mae'r cyfan yn rhan o awyrgylch y dirwedd." Newydd ei gyhoeddi mae'r llyfr Enfys o Liwiau: Mary Lloyd Jones a gyhoeddir gan Wasg Gomer a phecyn celf cynhwysfawr yn seiliedig ar ei gwaith.
Os am ddod i adnabod Mary Lloyd Jones yn well a deall yr hyn sy'n ei hysbrydoli, dyma arweiniad perffaith. Cafodd ei geni ym Mhontarfynach, Aberystwyth a dylanwadwyd arni gan y golygfeydd a'r synau o'i chwmpas, y marciau a grëwyd gan ffermio a mwyngloddio, y cynllun tlws ar gwilt ei hen fam-gu a chan straeon dirgel y storïwyr lleol. Mae'r profiadau cynnar rheiny wedi helpu i ffurfio artist sydd yn enwog am ei defnydd arbennig o liw, siâp a'r wyddor hynafol.