Pwy ond gweinidog sydd yno ar amseroedd mwyaf tyngedfennol bywyd - o'r bedydd, i'r briodas a'r angladd. Fe sy'n gwrando ar gyffes ac sy'n rhoi clust i sawl un arall sy'n rhan o'i gynulleidfa. O gofio hynny i gyd, 'sdim rhyfedd bod angen synnwyr digrifwch arno!
Roedd tynnu coes, ffraethineb a hiwmor yn rhan bwysig o fywyd cefen gwlad yn nyddiau plentyndod Goronwy Evans. Mae ei fywyd wedi troi o gylch tair Llan - Llanwenog, Llandysul a Llanbed ac yn yr ardaloedd hynny clywodd sawl perl o enau plant a chymeriadau lliwgar eraill. Mae'r llyfr difyr hwn yn llawn o hanesion gwir, jocs heb eu hail a cherddi ffraeth sy'n dangos hiwmor y Cardi ar ei orau. Yng ngeiriau'r awdur ei hun - "Mae chwerthin a hiwmor yn donic i'r enaid ac yn eli llesol. Fyddwn i byth wedi treulio yn agos at hanner can mlynedd yn y weinidogaeth hebddo."