Os yn archebu o’r tua allan i’r DU mae’n bosib y bydd yn rhaid i chi dalu treth a chostau dosbarthu eraill ar ben ein costau postio ni.

Paid â Bod Ofn: Cyfrol amrwd a chynnes am Eden, bywyd a iechyd meddwl

Yr wythnos hon cyhoeddir llyfr onest a chynnes gan y gantores Non Parry – Paid â Bod Ofn. Yn fwy na hunangofiant, mae’r gyfrol amrwd yn siarad yn agored am ei bywyd, iechyd meddwl ac am salwch ei gŵr, yr actor Iwan John, a’r effaith mae’r profiadau hyn wedi ei gael ar y teulu oll.

Meddai Non:
“Rwy wastad wedi ffansïo sgwennu llyfr. Rwy’n ffan mawr o lyfrau gan bobl sy’n rhannu profiadau ac yn meddwl eu bod nhw’n ysbrydoledig iawn – ac yn gallu bod yn gysur mawr. Ro’n i’n gwybod mod i wedi cael lot o brofiadau falle fysa’n gymorth i bobol eraill.”

Daeth Eden ar y sin pan oedd Non ond yn ddwy ar hugain oed. Dros nos roedd hi’n wyneb cyfarwydd yn gwireddu breuddwyd plentyndod gyda’i ffrindiau gorau, Emma a Rachael. Ond yn dawel bach, a thu ôl i’r wen a’r gytgan ‘Paid â Bod Ofn’, roedd yna Non wahanol iawn. Yn 2019 penderfynodd ei bod hi’n amser cyfadde: roedd ofn lot fawr o bethau arni. Wedi blynyddoedd o ddioddef gyda phroblemau iechyd meddwl, gwnaeth Non ddatgan y gwir.

“Y funud nesa roedd beth oedd wedi bod yn mynd ymlaen yn fy mhen i yn un o’r penawdau ar newyddion S4C! I MEAN… os ti’n mynd i fod yn agored efo pobol am y stwff ti ‘di cuddio am dy iechyd meddwl ers blynyddoedd, lle gwell i ddechre nag ar y niws??!!” meddai Non am y profiad.

Mae Paid â Bod Ofn yn stori am dyfu fyny yn Rhyddlan, o fod yn blentyn ansicr oedd yn dioddef o OCD a gorbryder, i fod yn oedolyn ifanc yn perfformio o flaen miloedd. Mae’n trafod sut daeth Eden at ei gilydd, a dylanwad ei ffrind a chyfnither Caryl Parry Jones ar ei gyrfa. Mae’n sôn yn onest am y panic attacks, yr iselder a’n gorbryder mae’i wedi’u dioddef ar hyd ei bywyd. Mae hefyd yn trafod salwch ei gŵr Iwan John, wrth iddo aros am drawsblaniad aren, y profiad o ddod yn llysfam i blant ifanc yn 24 oed ac mae’n adrodd yn gignoeth am enedigaeth ei phlant, y profiad o fod yn fam – ynghyd â camesgoriad ddioddefodd a’r galar ar ôl colli ei mam ei hun.

“Wrth ysgrifennu Paid â Bod Ofn rwy wedi dod i sylweddoli fy mod i lot cryfach nag o’n i wedi meddwl. Ac rwy’n gobeithio y bydd y llyfr yma yn neud i ddarllenwyr sylweddoli pa mor gryf ydan ni gyd. Dan ni’n arwyr ac yn brif gymeriadau yn ein straeon ein hunain. Rwy hefyd yn gobeithio y bydd y gyfrol hon yn gneud i bobl chwerthin ychydig hefyd!”