Un o'r gogoniannau sydd gennym fel Cymry Cymraeg yw ein treftadaeth lenyddol. Treftadaeth sy'n ymestyn yn ôl dros fil a hanner o flynyddoedd, ac un o'r pethau sydd wedi bod yn rhan o'r waddol hon o'r dechrau un yw ein diarhebion. Yn ôl yr Athro Bobi Jones, y ddihareb yw'r uned lenyddol leiaf, ac y mae gennym yn Gymraeg ffynonellau dihysbydd o ddiarhebion wedi eu casglu - fel rhan o ddysg yr ysgolion barddol, gan ysgolheigion newydd y Dadeni Dysg yn ogystal â'r rhai cyfoes a gyfansoddir gan ein beirdd a llenorion heddiw.
Un o nodweddion dihareb yw na ellir deall ei hystyr fesul gair ond yn hytrach yn y darlun mae'n ei gyflwyno, darlun sy'n perthyn i gymuned arbennig mewn cyfnod arbennig. Er mwyn ceisio cyflwyno ystyr y ddihareb heddiw, rhestrwn gasgliad o ymadroddion a diarhebion Saesneg, nad ydynt efallai yn cyfieithu'r geiriau Cymraeg ond sy'n cyfateb i ergyd y ddihareb yn Gymraeg.