O agor rheilffordd rhwng y Bala a Blaenau Ffestiniog i sefydlu gwersyll hyfforddi milwrol ar gyrion y pentref, codi argae er mwyn creu Llyn Trawsfynydd ac adeiladu'r atomfa – mae hanes yr ardal hardd hon yn ddifyr tu hwnt.
Mae'r llyfr llawn lluniau trawiadol hwn yn adrodd stori ddramatig bro Trawsfynydd. Fe'i lluniwyd yn gyfrol gofiadwy gan y ffotograffydd Keith O'Brien a chwmni cymunedol Traws-Newid a sefydlwyd yn 1998 gyda'r nod o wella economi, amgylchedd ac agweddau cymdeithasol y cylch.
Cyhoeddir hi i gofio canmlwyddiant marwolaeth Hedd Wyn ac Eisteddfod y Gadair Ddu yn haf 2017, ac mae'n cynnwys rhagair gan y llenor Dewi Prysor sydd hefyd yn frodor o'r ardal.