Y Cytundeb Cyhoeddi

Bydd y Cytundeb Cyhoeddi yn debyg iawn i un arferol Y Lolfa, ond gyda rhai cymalau pwysig sy'n fwy ffafriol i'r awdur. Dyma grynodeb o'r prif bwyntiau:

Yr awdur yw perchennog hawlfraint ei waith. Trosglwyddir yr hawl i'w gyhoeddi i'r cyhoeddwr am gyfnod cychwynnol o ddwy flynedd. Os bydd y llyfr yn gwerthu allan cyn diwedd y ddwy flynedd, bydd y cyhoeddwr yn ailargraffu'r llyfr yn rhad ac am ddim. Pan ddaw'r ddwy flynedd i ben, gall yr awdur barhau i gyhoeddi gyda Dinas, neu gall derfynu'r cytundeb gan gymryd y stoc i gyd o'r Lolfa.

Mae'r rhediad argraffu a'r pris i'w cytuno gan yr awdur a'r cyhoeddwr, ond gan y cyhoeddwr y mae'r gair olaf os bydd anghytundeb. Ni ellir argraffu llai na 500 copi, na dim mwy na 1,000 heb gytundeb yr awdur.

Bydd y cyhoeddwr yn gyfrifol am werthu hawliau yn y dull arferol, gan roi 67% o'i holl dderbyniadau i'r awdur.

Telir breindaliadau ddwywaith y flwyddyn ar gyfer cyfnodau yn diweddu ym Mawrth a Medi; bydd y breindal yn 25% o'r holl symiau a dderbynia'r cyhoeddwr.

Fe gaiff yr awdur 30 copi rhad, a gall brynu copiau ychwanegol ar ostyngiad o 35%.