Mae Elliw Gwawr wedi mwynhau coginio ers ei bod yn blentyn, ac mae'r llyfr llawn lliw hwn yn estyniad o'i blog poblogaidd sy'n rhannu cyngor yn ogystal â chynnig ryseitiau hyfryd i dynnu dwr o'r dannedd.
Mae'n llawn o'r ryseitiau y mae Elliw ei hun yn hoffi eu coginio: yn gacennau, bisgedi a phwdinau. Mae hi wedi profi pob rysait gartref yn ei chegin ac mae'n rhoi cyngor ar sut i gael y canlyniadau gorau bob tro, fel y gallwch fod yn hyderus y byddwch chithau'n llwyddo yn eich cegin eich hun hefyd.
Mae'r ryseitiau wedi'u rhannu'n wahanol adrannau - Cacennau bach, Bisgedi, Toes, Amser te, Hen ffefrynnau, Pwdin, Plant a Nadolig - ac mae'r cyfan wedi'i ddylunio'n ddeniadol gyda ffotograffau Warren Orchard ac Elliw ei hun a darluniau Dorry Spikes.
Mae Elliw wastad wedi credu bod pobi'n ffordd dda o ymlacio, a pha well ffordd o dreulio prynhawn na thrwy greu cacen flasus? Mwynhewch y pleser sydd i'w gael o bobi gyda'r llyfr hardd hwn.