Fel hogyn ifanc yn Nyffryn Ogwen mae Dr Tudor yn cofio treulio oriau ar lethrau'r Carneddau yn chwilio am weddillion awyrennau rhyfel tra gweithiai ei dad yn Chwarel y Penrhyn. Ond go brin iddo ddychmygu y byddai ei awydd bore oes i fod yn feddyg yn mynd ag yntau i ryfel yn y Dwyrain Canol.
Er iddo dreulio deugain mlynedd fel meddyg teulu yng Nghriccieth, nid dyna oedd dechrau'r daith i Dr Tudor. Yn yr hunangofiant dadlennol hwn mae'r doctor poblogaidd yn rhannu hanesion annisgwyl ei anturiaethau yn niffeithwch y Sahara, ac yntau'n feddyg gyda'r fyddin yn Libya. Ac ar ôl dod yn ôl i gefn gwlad y Gogledd dysgodd yn fuan nad oes dim yn dawel am fywyd meddyg teulu mewn tref glan môr boblogaidd fel Criccieth.