Fe dynnodd Iestyn Hughes nifer o luniau o stormydd a thywydd mawr diwedd 2013 a dechrau 2014. Erbyn hyn maen nhw wedi cael eu gweld dros 2,000,000 o weithiau ar y we. Dyna'r sbardun ar gyfer casglu deunydd ar gyfer y gyfrol hon.
Mae pobl yn mwynhau trafod y tywydd – mae'n rhan o destun sgwrs bob dydd. Cafodd artistiaid a beirdd eu hysbrydoli gan dywydd dros y canrifoedd ac mae'r iaith Gymraeg yn frith o ddywediadau am y tywydd drwy'r flwyddyn gron.
dyma gyfrol sy'n llawn o ffotograffau o wahanol gasgliadau gan gynnwys archif Llyfrgell Genedlaethol Cymru, lle ceir y ffotograff cyntaf erioed o ddyn eira a dynnwyd tua 1854, ac un o bobl yn sglefrio ar afon Teifi yn 1891. Mae yma hefydd baentiadau gan Breugel, Aneurin Jones a Kyffin Williams.
Gyda hinsawdd y byd yn newid fesul blwyddyn, mae'r gyfrol yn dangos lluniau o effaith hynny ar fynyddoedd yr Alpau a rhewlif diflanedig yng Nghanada. Ond golygfeydd dramatig o Gymru benbaladr a welir yma yn bennaf – eira 1947 ac 1978, sychder haf 1976 a llifogydd 2004, yn ogystal â stormydd 2013/14 ar hyd arfordir gorllewin Cymru.